نبذة عن الكتاب

الكتاب ده لكل طنط شافتك وقالتلك "اتجدعني بقي وهاتيلنا عريس حلو" .. و اللي لما شافت عروسة تاني يوم فرحها قالتلها "شدي حيلك كدة مفيش حاجة جاية في السكة! طب ما تكشفي يا بنتي!" الكتاب دة لمجتمع بيشوف المطلقة لابسة الحتة الساتان وواقفة علي السلم تخطف جوز جارتها.. الكتاب دة لمجتمع بيشوف ان المتغرب شوال دولارات وبرنس الملايين وكينج العملة الصعبة. الكتاب دة لهواة التصنيفات... دي مُحجبة ودي فاسخة مرتين ودي بتشيش ودي لابسة مايوة وكل التصنيفات اللي ما فيهاش توصيف شخصيتها وبيقول "مين هي".. الكتاب دة للي شايف ان مشكلة كبيرة زي الخيانة ممكن تتحل بجملة "سافرلكوا يومين واهتمي بنفسك شوية ما انت برضو بعد الولادة تخنتي اوي والراجل ضعيف!" .. الكتاب دة للي اتجوزت عشان ترضي الناس وللي مخلفة بنات وبتموت علي خلفة ولد عشان ترضي جوزها الكتاب للي بيقول ان البلد متخلفة ومفيش منها رجا .... ولطنط اللي بتقول علي المدارس الإنترناشيونال "منظرة" ...وللي بيأسفننونا وبيطلعوا عينينا "زنبقة" في الشغل ... وللي مبيضحكش غير لما مديرة هو اللي يقول الافيه... وللي بيسّب في فساد البلد عالفيسبوك وبينزل يرشي امين الشرطة عشان مياخدوش مخالفة انه ماشي عكسي.. الكتاب دة للي مش فاهم ان النجاح هو انك تنجح في إنسانيتك قبل ما تنجح في منصبك. الكتاب دة مراية لينا كلنا.. بصوا فية وشوفوا صورتنا.. أيوة صورتنا بس بأبعاد ومقاسات واقعية جدا جدا.